गोड आठवण...

flashback मध्ये एकदा

जाऊ म्हटलं मनाने

वर्तमानात अजूनही तरी

निष्ठेने होतो तनाने

भुरभुरीत वाळूत मारल्या रेषा

थंड पाण्यात बुडवले पाय

समुद्राच्या लाटा झेलू

फतकल मारल्याशिवाय पर्याय काय!

दुसऱ्यांचे गड-किल्ले

पादाक्रांत करून झाले

आणि माझी अक्षरं बुजवणाऱ्या लाटेला

झोपून देऊन मी अडवले

अजिंक्य उरलेल्या माझ्या किल्ल्यावर

मी फडकवले जिंकलेले निशाण

मान लवून सूर्यानेही

त्याची ठेवली पूर्ण जाण

 

त्याचा प्रणाम स्वीकारत होतो

तर मध्येच कोण हे हसलं?

रात्रभरच्या मेहनतीच्या चिंध्या करून

त्यावर माझं बाळ होतं बसलं

 

उगारलेल्या हाताला लगाम घालायला

धावत आलं माझं मन

आणि बाळाच्या वर्तमानाला प्रेमाने

मीही दिली एक गोड पाप्याची आठवण!

...भावना

Elvis Presley ...The King of Rock and roll

आठवणींची गोधडी...

आठवणींची विरली गोधडी

आलो घेऊन तुझ्या घरी

                                               

ते जीर्ण धागे सांधले

हीच किमया तुझी खरी
 

मोरपंख हि नक्षीने

विणलास अजून तू त्यावरी
 

मोहरले ते वस्त्रहि

शरमेल शालू भरजरी
 

कोमेजली जणू ती कळी

हरखून झाली तरतरी

परतून स्वप्ने जागली

अन माया पालवली उरी

 

क्षणार्ध अंतर संपले

चैतन्य भरले चराचरी

 

नकळले कधी बरसल्या

आनंदे ओघळल्या सरी

 

पाठीवर फिरला हात तो

वर, “अस्तु!”, बोलला हरी

 

आठवणींची उब अन हि गोधडी

जपेल मज प्राणापरी

...भावना

तप्त सत्यनिष्ठेचे बोल...

हे रक्त थंड का?

उर्जेची कवाडं खोल

झरू दे लेखणीतून तुझ्या

तप्त सत्यनिष्ठेचे बोल

 

का रडतो? मुळमुळतो?

विश्वासावर गर्वाला तोल

श्रद्धेवीण डळमळल्या

आयुष्याला शून्य मोल

 

अजून वेळ दवडू नको

नको बुजवू उरलेली ओल

जगाकडे डोळे जरी

अंती-आदि तूच, पृथ्वी गोल

 

शुद्ध मनाच्या भूवर उभा

स्वर्गसुखाचा डामडोल

बुरसटल्या विचारांची

कात मुळातून सोल

 

येता- जाता नको बडवू

उगा देशप्रेमाचा ढोल

सोपवल्या आयुष्याला

पेल, नको ठरवू फोल

 

झरू दे लेखणीतून तुझ्या

तप्त सत्यनिष्ठेचे बोल

...भावना

हे हल्ली forward म्हणतात स्वतःला!!!

कानाला काम सारखं, नाही आराम

खांदा दिलाय handset ला

बोटं message करण्यात busy

बोलू कधी? जर कुणी भेटला??...

डोक्याला likes च्या count चं tension

डोळे गर्क, चालू emoji selection

data package चं general knowledge

latest phone सगळ्यात आधी घेतला

बोलू कधी? जर कुणी भेटला??...

 

 

असंख्य links आणि किती ते photo !!

taste चं झालंय ajinomoto

forwarded messages चे ढीग उपसले

तरी एकही मनाला नाही पटला

बोलू कधी? जर कुणी भेटला??...

किती forwards ! आता थांबवा हाताला

हल्ली तर हे forward म्हणतात स्वतःला

down market झालंय का विचार मांडणं?

कि यांना कधीच कोणी original नाही वाटला??

आणि बोलतील का ते जर कधी भेटला???

...भावना

कळा...

चिखल असेन हि,

पण मी ठसा तुझा जपला

तू पाऊल धुतलेस,

तरी मनी या कमळ-कळा लपला

 

तू असशील वारू,

ती नाल तुला पेलते

तुझे वेड वेगापुढे,

ती ढाल होऊन झेलते

 

ती वेडी आयुष्य हे,

शोधते झिजण्यात पुन्हा

तापवणे, वाकवणे,

हे नशीब तिचे,

जरी नाही गुन्हा

 

भाग्य तिचे घरोघरी,

वेशीला टांगले

लाथाडले तू तिला,

बाकी, घाव घालून पांगले

 

असणे नुसते तुझे, आता अर्थ हि हा लोपला

काय मऊ स्पर्श हा, कुठे सांग असा खुपला?

चिखल असेन हि, पण मी ठसा तुझा जपला

तू पाऊल धुतलेस, तरी मनी या कमळ-कळा लपला

...भावना

डायरी त ली शायरी ......६

*......उपरवालेने भेजा है जो, हाथ मे कलम थामे

    हम बस लिखते गये, और स्याही की कमी न थी

    आसू की तो बोतले मिली भर भर के

    बस तेरे थोडेसे हंसी की जरुरत थी

 

*......गालिब ने अगर देखा उपरसे,

      'ये हाथ किसके हे ?' पूछे गा, परेशान होकर

    गुलजार को अगर ये राज मालुम हुआ

    कही लिखनाहि ना छोडदे, अपना ध्यान खोकर

 

*......तमन्ना अगर अरसोंसे दबी हे दिल मे

    गुजारिश कर उसे, के तेरी तुजसे मुलकात होगी

    चिंगारी जो तुजमे बची हे अबतक

    लौ दिये की बचा, तुफानी बरसात होगी

...भावना

Kishore Kumar

Anil Kapoor

John Abraham

A P J Abdul Kalam

कमाल केलीत कलाम!

ऐकू आलं तुमच्याकडे नव्हती काहीच मालमत्ता

हातात असूनही, निरुपयोगीच ठरवलीत तुम्ही सत्ता

जगाच्या उठाठेवीत, आपलं घरही नाही बांधलंत

कमाल केलीत कलाम! सांगा काय तुम्ही साधलंत?

 

चौवीस तास चारशेचौवीस वाहिन्यांवर, तुमचीच होती बातमी

पण आश्चर्य म्हणजे, कधी टीव्हीच नव्हता पहात तुम्ही!

विज्ञानाचे पुरस्कर्ते, तरी ऐशारामाला का हो त्यागलंत?

कमाल केलीत कलाम! सांगा काय तुम्ही साधलंत?

 

अखेरच्या क्षणी हि तुम्ही, कामात होता व्यस्त

शिक्षण, जनजागृती यांची तुमच्यावरच होती का हो भीस्त?

एक दिवस सुट्टी मिळायची, पण नाही का हो म्हटलंत?

कमाल केलीत कलाम! सांगा काय तुम्ही साधलंत?

...भावना

आठवतेय का, ही मराठी शाळा?

खूप अभिमान वाटतोय सर, मुलं आता मोठी झाली

दगडीपाटीवरची अक्षर, विदेशातही उठून दिसली

हजेरीपटाला मात्र आता, आलीय फारच अवकळा

सांगा ना सर! मुलांना आपल्या आठवतेय का, ही मराठी शाळा?

 

तो त्या देशात, हा ह्या देशात, सगळेच तर आता आहेत विखुरले

अखंड भारताच्या बंडासाठी, इथे कुणीच नाही हो उरले!

खेचून आणेल का हो त्यांना परत, या गाभुळलेल्या चिंचांचा लळा

सांगा ना सर! मुलांना आपल्या आठवतेय का, ही मराठी शाळा?

 

झगमगाटापाठी सगळे, तेवत नाहीये घरची वात

विकृती बाळसं धरू लागलीये, लपून प्रगतीच्या सोंगात

सुविचाराची अक्षर, तरीही जपतोय जुना फळा

सांगा ना सर! मुलांना आपल्या आठवतेय का, ही मराठी शाळा?

 

अजूनही आशा वाटतेय सर, असेच सगळे धावत येतील

या मातीला ती मऊ पावलं, पुन्हा सुखाचा स्पर्श देतील

इतक्या कठोर होत्या का हो सांगा, शिक्षेच्या त्या कळा

सांगा ना सर! मुलांना आपल्या आठवतेय का, ही मराठी शाळा?

 

...भावना

पूर्तता...

तू वृक्ष खंबीर, होऊनी मी लता

अशी बिलगले, विलग न होणे आता...

 

सुखाच्या सरींनी, इथे चिम्ब न्हावे

घडे अमृताचे, तृषातृप्त व्हावे

 

दिशाहीन दाहीदिशांना मिळावी

इथे शांतता अन इथे पूर्तता

 

तू वृक्ष खंबीर, होऊनी मी लता

अशी बिलगले, विलग न होणे आता...

...भावना

हे जगणे सोपे नाही!...

मुठी वळोनी जन्मा आलो

लढण्या सिद्ध तिथेच झालो

आयुष्याच्या पटलावरती सतत युद्ध रंगते

हे जगणे सोपे नाही, नियती हेच तुला सांगते

 

सदैव येथे वरती चढणे

अवैध असुनी पाय खेचणे

सरपटणारे जीवन येथे कण्याविना रांगते

हे जगणे सोपे नाही, नियती हेच तुला सांगते

 

हाय खाउनी पळू नको तू

आहे त्यावर, न उतू न मातु

दोन घडीचा डाव मांडला...

खेळाडूसम झेल हार, जीतहि उद्या पांगते

हे जगणे सोपे नाही, नियती हेच तुला सांगते

...भावना

मैत्रीचं नातं...

या डोळ्यांतलं पाणी

जेंव्हा त्या डोळ्यांतून ओघळलं

तेंव्हाच म्हणावं

इथे मैत्रीचं नातं जुळलं...

आकाशात असंख्य ढग

इथे-तिथे जात असतात

वाऱ्याबरोबर असंख्य गोष्टी

जिथे-तिथे वहात असतात

एकत्र आल्या असतीलही

दोन क्षण असेलही कदाचित कुणी-कुणाकडे वळलं...

पण या डोळ्यांतलं पाणी

जेंव्हा त्या डोळ्यांतून ओघळलं

तेंव्हाच म्हणावं

इथे मैत्रीचं नातं जुळलं...

उरत नाही तेंव्हा अंतर

गरज नसते वाटाड्या, निरोप्याची नंतर

कावरा-बावरा होतो श्वास

दूरच्या श्वासाच गाणं

थोडं जरी लयीला ढळलं...

म्हणून या डोळ्यांतलं पाणी

जेंव्हा त्या डोळ्यांतून ओघळलं

तेंव्हाच म्हणावं

इथे मैत्रीचं नातं जुळलं...

मैलोंमैल प्रवास हा

भेटतात वाटेत कित्येक जण

थांबून बोलून त्यांच्याशीही 

सोपी होते वणवण

भली-बुरी संगत-साथ

हवीच, पण मिळावा

घट्ट मैत्रीचा हात

मनाच्या तळाशी खोलवर

कधीतरी कळेल कोणाला काय जळलं...

या डोळ्यांतलं पाणी

जेंव्हा त्या डोळ्यांतून ओघळलं

तेंव्हाच म्हणावं

इथे मैत्रीचं नातं जुळलं...

तिथेच मैत्रीचं नातं जुळलं!!!

...भावना